Agid

Tschertgar spert ed a moda nuncumplitgada

Il Pledari Grond online permetta da chattar spert in pled. Cumenzai simplamain a scriver in pled en tudestg u en rumantsch ed ils resultats cumparan immediat. Vus na stuais gnanc scriver a fin il pled tschertgà e cliccar sin "tschertgar".

Proponer novs pleds e novas expressiuns

Vus pudais far propostas per novs pleds u novas expressiuns. Cliccai directamain en la trav giudim sin "far ina nova proposta", lura cumpara in formular, en il qual Vus pudais scriver Vossa proposta e far remartgas. Sch'ina tschertga n'ha dà nagins resultats, cumpara medemamain il buttun "far ina proposta". Cliccai sin quel per avrir in formular, en il qual Vus pudais medemamain scriver Vossas propostas e far remartgas.

Proponer modificaziuns

La redacziun dal Pledari Grond è engraziaivla, sche Vus la rendais attent a sbagls u inconsequenzas. Vus pudais proponer modificaziuns u correcturas cun il formular correspundent. Il buttun "modifitgar" vegn visibel, sche Vus giais cun il cursur da la mieur sur la glista da resultats. Cliccai sin quest buttun per avrir in formular. En il formular vesais Vus l'endataziun che Vus vulais curreger. Vus pudais scriver directamain en il champ. Cun cliccar sin il + pudais Vus activar dapli opziuns. Ina da quellas ha num "marcar novas propostas u modificaziuns". Activai quella cun la mieur e Vus vesais Vossa modificaziun en colur sura u sut l'endataziun existenta. Quella resta fin ch'il team da redacziun ha verifitgà ella.

Ulteriuras opziuns

Ulteriuras pussaivladads da tschertgar e funcziunalitads vesais Vus, sche Vus cliccais sin il +.

Lingua

Vus pudais activar "tudestg e rumantsch" u "tudestg-rumantsch" u "rumantsch-tudestg", tut segund sche Vus vulais tschertgar in pled u in'expressiun en tuttas duas parts da la banca da datas, mo en la part tudestga ubain mo en la part rumantscha.

Pussaivladads da tschertgar

Vus pudais tschertgar ils pleds en differentas modas tut tenor Voss basegn:
  • normal: Il modus "normal" tschertga il pled endatà, tut las ulteriuras noziuns che cumenzan cun quest pled e tut las expressiuns che cuntegnan ina noziun che entschaiva cun quest pled (p.ex. cumpara era "vor Ort arbeiten", sche Vus avais endatà "arbeit").
  • dapertut: Il modus "dapertut" tschertga tut las noziuns che cuntegnan il pled u ils bustabs endatads en il champ da tschertgar. Cun quel modus pudais Vus pia era tschertgar modas da dir e locuziuns.
  • entschatta: Il modus "entschatta" tschertga tut ils pleds che entschaivan cun la noziun da tschertga.
  • finiziuns: Il modus "finiziuns" tschertga tut ils pleds che fineschan cun il pled u ils bustabs endatads en il champ da tschertgar.
  • exact: Il modus "exact" tschertga en la banca da datas exactamain il cuntegn endatà en il champ da tschertgar.
Sche Vus activais il quadret marcar il pled u l'expressiun che Vus tschertgais, vegnan marcads grass en ils resultats quels bustabs che Vus avais scrit en il champ da tschertgar. Quai facilitescha magari la survista en cas da blers resultats ubain expressiuns pli lungas.
Sche Vus activais il quadret marcar novas propostas u modificaziuns, vesais Vus, sch'in auter utilisader ha gia proponì da modifitgar in pled u in'expressiun che Vus vulevas gist modifitgar. La proposta cumpara lura en colur davant u suenter l'endataziun existenta e resta, fin ch'il team da redacziun ha verifitgà ella.

La glista da resultats

Ils resultats vegnan preschentads en ina glista cun duas colonnas. La glista mussa sisum il pled tschertgà ed en parantesas ils resultats visibels sin la pagina ed il dumber da las endataziuns chattadas. Sin mintga pagina cumparan maximalmain 15 resultats. Sch'ina tschertga dat dapli che 15 resultats, pudais Vus sfegliar enavant ed enavos sut la glista per guardar ils ulteriurs resultats. Suenter in substantiv cumpara en parantesas quadras er il genus dal pled (feminin, masculin, etc.). Davant mintga verb rumantsch che cumpara sulet stat l'icona V. Sche Vus cliccais sin quella, s'avra ina fanestra cun la conjugaziun cumpletta.

Tge far, sche Vus na chattais betg in pled?

Il sistem da retschertga dal Pledari Grond online tschertga in u plirs pleds che paran da correspunder a quai che Vus avais endatà. Eventualmain na correspundan quels dentant tuttina betg a quai che Vus tschertgais. Tge far, sche Vus na chattais betg in pled?

Verifitgar l'ortografia

  • Avais Vus scrit correctamain il pled rumantsch / il pled tudestg?
  • Attenziun: Il Pledari Grond online enconuscha mo l'ortografia dal rumantsch grischun resp. dal tudestg da scrittira! Tut las furmas idiomaticas e dialectalas tant dal rumantsch sco dal tudestg na sa il program da tschertgar betg identifitgar.
  • Utilisai cun endatar pleds tudestgs ils bustabs ä, ö ed ü (betg: ae, oe, ue), endatai pia: ändern, öffnen, Bemühung (betg: aendern, oeffnen, Bemuehung).

Verifitgar la lingua − avais Vus activà la dretga lingua da partenza?

  • Vus tschertgais ubain in pled rumantsch u in pled tudestg: activai "tudestg e rumantsch".
  • Vus tschertgais la translaziun tudestga d'in pled rumantsch: activai "tudestg-rumantsch".
  • Vus tschertgais la translaziun rumantscha d'in pled tudestg: activai "rumantsch-tudestg".
  • Empruvai da tschertgar cun activar il modus "dapertut". Vus survegnis tut las expressiuns u modas da dir che cuntegnan il pled endatà.

Empruvai da tschertgar cun endatar ils singuls pleds d'ina frasa u construcziun

p.ex. Ich liebe dich:
  • ich (-> jau) ed alura
  • lieben ed in clic sin l'icona V -> 1. pers. sg (-> am/hai gugent), alura tschertgar
  • dich (-> tai)
  • -> jau am tai/jau hai gugent tai

Vus tschertgais in substantiv u in nomen

Endatai adina il pled senza l'artitgel, damai: cucagna (betg: la cucagna), enviern (betg: l'enviern), sport (betg: il sport), Überfluss (betg: der Überfluss), Kraftwerk (betg: das Kraftwerk), etc.
Endatai mintgamai la furma singulara d'in pled, damai: Frau (betg: Frauen), Arbeitskollege (betg: Arbeitskollegen), Bedachung (betg: Bedachungen), Haar (betg: Haare), Schneeschuh (betg: Schneeschuhe), Seelöwe (betg: Seelöwen), Verein (betg: Vereine), etc.
Il medem vala per ils substantivs u nomens rumantschs, damai: um (betg: umens), chalzer (betg: chalzers), chapè (betg: chapels), nanin (betg: nanins), siemi (betg: siemis), vestgì (betg: vestgids), etc.

Vus tschertgais in pled tudestg cumponì betg anc existent en il Pledari Grond online

Empruvai cun endatar las singulas parts dal pled cumponì, pia p.ex. Büro ed alura Stuhl, Küche ed alura Tür, midai per rumantsch la successiun dals pleds e colliai ils pleds cun la preposiziun "da", pia: sutga da biro, isch da cuschina.
Empruvai da tschertgar in pled cumponì sumegliant. Sche Vus tschertgais p.ex. Klimawandel e quel n'exista betg, endatai Klima (cun il modus "normal") e Vus survegnis p.ex. Klimawechsel -> midada dal clima.

Vus tschertgais in adjectiv

Endatai mintgamai la furma masculina dal singular, damai: mächtig (betg: mächtige), schön (betg: schöne), resp. bel (betg: bels, bella, bellas), empernaivel (betg: empernaivels, empernaivla, empernaivlas), chasan (betg: chasans, chasana, chasanas), etc.

Vus tschertgais ina furma d'in verb

Endatai adina la furma da basa dal verb tschertgà, p.ex. determinar (betg: determinesch, determinà, etc.) resp. tudestg: probieren (betg: ich probiere, probiert, etc.) e cliccai lura sin l'icona V (che cumpara davant mintga verb rumantsch), alura s'avra ina fanestra che mussa tut las furmas dal verb.

Auters problems cun il Pledari Grond online?

Sche Vus inscuntrais auters problems cun utilisar il Pledari Grond online, contactai nus. Voss impuls e Vossas remartgas pon contribuir a render il Pledari Grond pli nizzaivel.

Lia Rumantscha
Redacziun Pledari Grond online

pg@rumantsch.ch